Skandapurāṇa Adhyāya 104

E-text generated on July 20, 2022 from the original TeX files of: Bisschop, Peter C. and Yuko Yokochi, eds. The Skandapurāṇa. Vol. V. Adhyāyas 96-112. The Varāha Cycle and the Andhaka Cycle Continued. Critical Edition with an Introduction & Annotated English Synopsis, in cooperation with Sanne Dokter-Mersch and Judit Törzsök. Leiden: Brill, 2021. (SP V) https://brill.com/view/title/59532

SP1040010: सनत्कुमार उवाच|
SP1040011: अथ ते तं मृगं व्यास दानवा भीमगर्जनाः|
SP1040012: आयुधैः समभिक्रुद्धास्ततक्षुस्तं तदा भृशम्|| १||
SP1040021: ते मृगा इव शार्दूलं सिंहपोतं गजा इव|
SP1040022: आजघ्नुर्दानवाः क्रुद्धा वराहं शस्त्रवृष्टिभिः|| २||
SP1040031: स चापि मृगशार्दूल उपविश्य महोदधौ|
SP1040032: आपो ऽपिबत्समाविश्य वह्निवद्वडवामुखे|| ३||
SP1040041: तथा तानीरितान्दैत्यैरायुधानि सहस्रशः|
SP1040042: व्यादाय सुमहद्वक्त्रं जग्रास च ररास च|| ४||
SP1040051: ग्रसित्वा तानि सर्वाणि शस्त्राणि स महाबलः|
SP1040052: दानवान्प्रति संचक्रे वेगं सिन्धुरिवापरः|| ५||
SP1040061: गजान्प्रति यथा सिंहः सिंहाञ्छरभराडिव|
SP1040062: गरुत्मान्भुजगान्यद्वच्छार्दूलश्च मृगानिव|
SP1040063: मेघवृन्दान्यथा वायुः कपोतानिव पक्षिराट्|| ६||
SP1040071: तथा स भगवान्व्यास दानवान्प्रति लोकपः|
SP1040072: वेगं चक्रे यथा क्षिप्तमिन्द्रियान्प्रति वै मनः|| ७||
SP1040081: आसाद्य च स तान्दैत्यान्महाजलदनिस्वनः|
SP1040082: सर्वान्विद्रावयामास रुद्रः पशुगणानिव|| ८||
SP1040091: कंचित्पद्भ्यां सुसंक्रुद्धो हस्ताभ्यामपरानपि|
SP1040092: अपरान्दंष्ट्रया तत्र ह्यप्रैषीद्यमसादनम्|| ९||
SP1040101: तलेन शम्बरं भूमौ कालशम्बरमेव च|
SP1040102: नरकं पादघातेन हयग्रीवं च मुष्टिना|| १०||
SP1040111: उरसा नमुचिं चापि महामायं च सुव्रत|
SP1040112: आहत्याहत्य संक्रुद्धः पातयामास देवपः|| ११||
SP1040121: तांस्तथा द्रावयाणं च गर्जमानं च सिंहवत्|
SP1040122: विप्रचित्तिर्वराहं तं मुष्टिनोरस्यताडयत्|
SP1040123: विप्रचित्तिं जघानोग्रं पार्श्वदेशे स मुष्टिना|| १२||
SP1040131: स आहतो वराहेण वराहं क्रोधमूर्छितः|
SP1040132: पुनर्जघान खड्गेन वक्षस्येनं विनादयन्|| १३||
SP1040141: अमृष्यमाणस्तं घातं वराहः स महाबलः|
SP1040142: मुष्टिना मूर्ध्नि तं दैत्यं वज्राभेन व्यताडयत्|| १४||
SP1040151: स दैत्यस्तेन घातेन भ्रमित्वा चक्रवत्तदा|
SP1040152: पपात भूमौ वेगेन वाताहत इव द्रुमः|| १५||
SP1040161: पतितं तं तदाभ्येत्य विप्रचित्तिं मृगेश्वरः|
SP1040162: पादे जग्राह देवेशो द्रावयाणो दितेः सुतान्|| १६||
SP1040171: भ्रामयित्वा ततश्चैनं नर्दित्वा चासकृद्बली|
SP1040172: पुरं प्रति विचिक्षेप महात्मा नन्दिवर्धनः|| १७||
SP1040181: स तेन क्षिप्तो विबभौ दानवाधिपतिर्बली|
SP1040182: सबलाकतडिज्ज्वालः परिच्छिन्न इवाम्बुदः|| १८||
SP1040191: स्रस्तहाराम्बरधरश्च्युतमाल्यविभूषणः|
SP1040192: पपातोपरि वेगेन हिरण्याक्षस्य वेश्मनि|| १९||
SP1040201: सोच्चमट्टालकं तस्य विमानमिव संस्थितम्|
SP1040202: चूर्णयानो ऽपतद्व्यास पर्वतेन्द्रमिवाशनिः|| २०||
SP1040211: महता चास्य शब्देन हिरण्याक्षः स्वयं तदा|
SP1040212: वेगेनागत्य ददृशे दानवेन्द्रं दितेः सुतः|| २१||
SP1040221: सो ऽपि दानवशार्दूलो वराहेणावताडितः|
SP1040222: तेन चैव निघातेन मुहूर्तमभवज्जडः|| २२||
SP1040231: तं समाश्वासयद्राजा तदा शीतेन वारिणा|
SP1040232: तालवृन्तैश्च बहुभिर्मणिभिश्च दितेः सुतः|| २३||
SP1040241: समाश्वस्योत्थितं चैव उपविष्टं वरासने|
SP1040242: राजा पप्रच्छ तं दैत्यं परं विस्मयमागतः|| २४||
SP1040250: हिरण्याक्ष उवाच|
SP1040251: केनाद्य हिमवान्दैत्य पृथिवी वा ससागरा|
SP1040252: महाबलैर्महादैत्य तुलिता विश्वकर्मणा|| २५||
SP1040261: केनाद्य मन्दरः स्रस्तो मृत्युः केन पराजितः|
SP1040262: केन त्वं दानवेशान क्षिप्तः को बलवान्भुवि|| २६||
SP1040271: पृथिव्यास्तुलनं यादृङ्मन्दरस्य च चालनम्|
SP1040272: मृत्योश्च बन्धनं तादृक्तवेदं क्षिपणं मतम्|| २७||
SP1040281: रुद्रेन्द्रमृत्युप्रतिमो लोकपालभयंकरः|
SP1040282: केन त्वं तुलितः संख्ये बलवानबलो यथा|| २८||
SP1040291: कस्येदं बलमक्षय्यं केन बाह्वोर्बलं महत्|
SP1040292: ख्यापितं त्रिषु लोकेषु दानवेश्वर कथ्यताम्|| २९||
SP1040300: सनत्कुमार उवाच|
SP1040301: तस्य तद्वचनं श्रुत्वा दानवः स महाबलः|
SP1040302: तमाह दीर्घं निश्वस्य निरीक्ष्य च पुनः पुनः|| ३०||
SP1040310: विप्रचित्तिरुवाच|
SP1040311: अमानुषमिदं राजन्नतिदेवं तथापि च|
SP1040312: अतिदैत्यं च दैत्येन्द्र न दृष्टं न श्रुतं क्वचित्|| ३१||
SP1040321: वराहस्य बलं यादृङ्न तादृक्कस्यचित्क्वचित्|
SP1040322: न हि तुल्यं प्रपश्यामि तस्य राजन्महात्मनः|| ३२||
SP1040331: अस्त्रैः शस्त्रैश्च बहुभिस्तक्ष्यमाणस्य संयुगे|
SP1040332: नार्तिर्न दुःखं दैत्येन्द्र न च संज्ञा प्रहीयते|| ३३||
SP1040341: भवेत्तस्याभिदष्टस्य मशकेनाप्यनिर्वृतिः|
SP1040342: न दैत्यदानवै राजन्निघ्नस्य भयमित्युत|| ३४||
SP1040351: यथा क्षुद्रमृगान्सिंहो मण्डूकानिव चोरगः|
SP1040352: तथा स कालयामास सर्वान्दैत्येन्द्रदानवान्|| ३५||
SP1040361: न तं मृगमहं मन्ये न देवं नापि चासुरम्|
SP1040362: को ऽप्यसौ दितिपुत्राणामनयः समुपस्थितः|| ३६||
SP1040371: तेनास्मि मुष्टिना मूर्ध्नि ताडितो भूतलं गतः|
SP1040372: गृहीत्वा सहसा क्षिप्तः पतितस्त्वद्गृहोपरि|| ३७||
SP1040381: दानवानां सदैत्यानामितरेषां च दानव|
SP1040382: न जाने समवस्थानं मन्ये ते सर्वशो हताः|| ३८||
SP1040391: अवध्यः स महातेजा बलवान्दुर्बला वयम्|
SP1040392: श्रुत्वैतद्दितिपुत्राणां हितं यत्तत्समाचर|| ३९||
SP1040401: तस्याङ्गे मुनयः सर्वे दृश्यन्ते सह देवतैः|
SP1040402: कृत्या सेति मतं मे ऽद्य तव हेतोर्विनिर्मिता|| ४०||
SP1040411: मनश्च तव दैत्येन्द्र युद्धाय कृतनिश्चयम्|
SP1040412: विनिवर्तय तच्चैव दैत्यानां हितमाचर|| ४१||
SP1040421: बलवान्सो ऽबला दैत्या वयं मर्त्याः स चामरः|
SP1040422: अजय्यो ऽसौ जिता दैत्या मा नो युद्धेन योजय|| ४२||
SP1040431: हित्वाश्मकपुरं सर्वे समुद्राम्भः समास्थिताः|
SP1040432: तिष्ठाम राजन्मा युद्धे तेन सार्धं मनः कृथाः|| ४३||
SP1040441: मावमंस्था मृगं दैत्य मृगो ऽसाविति सर्वशः|
SP1040442: नरसिंहो ऽप्यभूत्पूर्वं मृगस्तद्विदितं हि वः|| ४४||
SP1040451: यावत्त्वं ध्रियसे दैत्य दानवानां सुखावह|
SP1040452: तावत्सर्वे ऽसुरा जीवा भविष्यन्ति न संशयः|| ४५||
SP1040461: मा नशन्तु दितेः पुत्रा दनोश्चैव सुबालिशाः|
SP1040462: अपयाम पुरादस्मादसुरेश्वर सर्वशः|| ४६||
SP1040470: सनत्कुमार उवाच|
SP1040471: तस्य तद्वचनं श्रुत्वा हिरण्याक्षः प्रतापवान्|
SP1040472: उवाच दानवेशानं भीतं तस्य महात्मनः|| ४७||
SP1040481: असंशयं महात्मासौ मृगो दानवसत्तम|
SP1040482: येन मन्दरकल्पस्त्वं तुलितः सुमहाबलः|| ४८||
SP1040491: अद्य वर्षसहस्राणि दिव्यान्यसुरपुंगव|
SP1040492: चत्वारि भुञ्जतो राज्यं गतानि सुमहान्ति मे|| ४९||
SP1040501: पञ्चमं चानुसंप्राप्तं तावद्देवाश्च नाशिताः|
SP1040502: सबला बहुभिर्घोरैः संग्रामैरबला इव|| ५०||
SP1040511: सो ऽहं तथा बलोपेतो भुक्त्वा सर्वमकण्टकम्|
SP1040512: भीतः प्रविश्य सलिलं कथं स्थास्ये भुजंगवत्|| ५१||
SP1040521: मृगरूपी स विष्णुश्च वाराहं रूपमास्थितः|
SP1040522: यदि स्यात्तच्च कृत्यं मे दानवेश्वर मा भयम्|
SP1040523: ममापि बलमक्षय्यं तस्माच्च बलवानहम्|| ५२||
SP1040531: यो मे भयात्परित्यज्य स्वं रूपं मृगतां गतः|
SP1040532: यो हन्याद्धस्तिनं संख्ये सिंहं शरभमेव च|
SP1040533: तस्य कास्था भवेद्दैत्य मृगे ह्यस्मिन्महाबल|| ५३||
SP1040541: मद्भयात्स वराहश्च सर्वदेवैरधिष्ठितः|
SP1040542: मामाह्वयति दैत्येन्द्र जय एव ततो हि मे|| ५४||
SP1040551: भवानेव हि मे दैत्य तेन दूतः प्रवेरितः|
SP1040552: त्वरता मृत्युलोकं तु गत्वा दानवपुंगव|| ५५||
SP1040561: अद्य तं भ्रातृहन्तारं दानवानां भयंकरम्|
SP1040562: अहत्वा न निवर्तिष्ये शपे सत्येन दानव|| ५६||
SP1040571: सूतं ततः समादिश्य रथं सज्जमचीकरत्|
SP1040572: समाश्वासयितुं पत्न्यः प्रविवेश पुनर्गृहान्|| ५७||
SP1040581: स तत्र ताभिः कृतमङ्गलस्तदा दितेः सुतस्ताश्च निरीक्ष्य सर्वशः|
SP1040582: जग्राह सर्वं रणयोग्यमुज्ज्वलं महाबलः शत्रुनिवारणक्षमम्|| ५८||
SP1049999: इति स्कन्दपुराणे चतुरुत्तरशतो ऽध्यायः||