Skandapurāṇa Adhyāya 101

E-text generated on July 20, 2022 from the original TeX files of: Bisschop, Peter C. and Yuko Yokochi, eds. The Skandapurāṇa. Vol. V. Adhyāyas 96-112. The Varāha Cycle and the Andhaka Cycle Continued. Critical Edition with an Introduction & Annotated English Synopsis, in cooperation with Sanne Dokter-Mersch and Judit Törzsök. Leiden: Brill, 2021. (SP V) https://brill.com/view/title/59532

SP1010010: सनत्कुमार उवाच|
SP1010011: ते ऽभिनिर्गत्य वेगेन दंशिता दैत्यदानवाः|
SP1010012: वराहं प्रति संजग्मुर्मृगाः सिंहमिवातुराः|| १||
SP1010021: ते वराहदृशा तेन नीयमानासुरेश्वराः|
SP1010022: आभान्ति व्यास संबद्धाः प्रोक्षिताः पशवो यथा|| २||
SP1010031: तान्निहत्य कृतान्तेन मृत्युना चावपाशितान्|
SP1010032: निनाय स तदा दैत्यान्पशूनिव यथा नरः|| ३||
SP1010041: गत्वा ते योजनान्यष्टौ उत्तीर्णं सागराम्भसः|
SP1010042: वराहं ददृशुः सर्वे सिंहं क्षुद्रमृगा इव|| ४||
SP1010051: ते मुहूर्तं निरीक्ष्यैनं परिवव्रुः समन्ततः|
SP1010052: विस्फारयन्तश्चापानि संक्रुद्धा दैत्यदानवाः|| ५||
SP1010061: तानापतत एवाथ निरीक्ष्य स समन्ततः|
SP1010062: वराहेन्द्रस्तदा दैत्यान्प्राहेदं सुमहाबलः|| ६||
SP1010070: वराह उवाच|
SP1010071: किं मा यूयं दितेः पुत्रा अभिद्रवत सर्वशः|
SP1010072: दूषयामि न वः किंचिदसुहृन्न च वो ह्यहम्|| ७||
SP1010081: अथैवंवादिनं दैत्या वराहं तं सुविस्मिताः|
SP1010082: पप्रच्छुः परिवार्यैव सर्वे दितिसुतास्तदा|| ८||
SP1010091: कस्त्वं वराहरूपीह तीर्त्वा सागरमूर्जितः|
SP1010092: इहागतः किमर्थं वा क्व वा गन्तव्यमित्युत|| ९||
SP1010101: तेषां तद्वचनं श्रुत्वा वराहो ऽसौ महामनाः|
SP1010102: उवाच दानवान्सर्वांस्तदा जलदनिस्वनः|| १०||
SP1010111: वराहो ऽहं यथा दैत्यास्तादृग्रूपं च पश्यत|
SP1010112: प्रचारार्थमिमं देशमागतो ऽस्मि न संशयः|| ११||
SP1010121: हृतभार्यो ऽहमन्येन विमना दैत्यपुंगवाः|
SP1010122: पर्यटंस्तस्य दुष्टस्य चिन्तयामि परिग्रहम्|| १२||
SP1010130: दानवा ऊचुः|
SP1010131: नायं प्रचारो युष्माकं दैत्यानामयमालयः|
SP1010132: अनादृत्य कथं दैत्यानिमं देशमुपागतः|| १३||
SP1010141: वयं त्वाद्य वधिष्यामः सर्वे मृगकुलाधम|
SP1010142: हत्वा च ते नयिष्याम सर्वे दैत्येश्वरं प्रति|| १४||
SP1010151: ततस्ते दानवाः सर्वे तमायुधवरैर्भृशम्|
SP1010152: निजघ्नुः पर्वतं यद्वन्मेघा वृष्ट्या समुन्नताः|| १५||
SP1010161: बलवान्सो ऽपि देवात्मा वराहः सुमहाबलः|
SP1010162: वध्यमानो ऽपि तान्दैत्यानिदं वचनमब्रवीत्|| १६||
SP1010171: न ह्यत्र भवतां किंचिदल्पमप्यसुरोत्तमाः|
SP1010172: अपराधं चकाराहं न करिष्ये करोमि वा|| १७||
SP1010181: किमर्थं मां शितैः शस्त्रैर्घ्नत सर्वे यथा परम्|
SP1010182: न हि नो वैरमस्तीह न च कार्यं मया हि वः|| १८||
SP1010191: अथ मांसेन कृत्यं वो ततो मा घ्नत दानवाः|
SP1010192: यथाप्राणं शितैः शस्त्रैर्युष्मत्तो न हि मे भयम्|| १९||
SP1010201: एतौ करौ प्रसार्याहं संस्थितो दितिनन्दनाः|
SP1010202: यदा भवन्तः स्थास्यन्ति तदा हन्तास्मि वः सकृत्|| २०||
SP1010211: अद्य वेत्स्यत दैतेया मृगाणामपि यद्बलम्|
SP1010212: मत्ता यूयं सुराञ्जित्वा तन्मदं नाशयामि वः|| २१||
SP1010220: सनत्कुमार उवाच|
SP1010221: ततः स भगवान्व्यास शक्रध्वजनिभौ भुजौ|
SP1010222: प्रसार्य तस्थावुद्यन्वै भगवानिव भास्करः|| २२||
SP1010231: ते ऽपि तद्वचनं श्रुत्वा दानवाः क्रोधमूर्छिताः|
SP1010232: निजघ्नुर्भृशमायस्ता नानाशस्त्रास्त्रपाणयः|| २३||
SP1010241: मेघैरिव महावायुर्गरुत्मान्भुजगैरिव|
SP1010242: मृगैरिव यथा व्याघ्रः शशैः सिंहशिशुर्यथा|
SP1010243: हविषेवानलो दीप्तो गजो गोमायुभिर्यथा|| २४||
SP1010251: तथा स भगवान्व्यास वराहो नन्दिवर्धनः|
SP1010252: तैरर्द्यमानो ऽगणयंस्तस्थावचलसंनिभः|| २५||
SP1010261: स यदा तैः शरैश्चैव गदामुसलकम्पनैः|
SP1010262: भिन्दिपालैर्भुसुण्डीभिः करवालैरयोमुखैः|| २६||
SP1010271: एतैश्चान्यैश्च बहुभिर्वध्यमानो मृगेश्वरः|
SP1010272: अदृश्यो विबभौ सर्वे तदा ते हर्षिता भृशम्|| २७||
SP1010280: सनत्कुमार उवाच|
SP1010281: तेषां निनदतां व्यास वराहो नन्दिवर्धनः|
SP1010282: शस्त्रकूटाद्विनिष्क्रम्य शिरांसि समपोथयत्|| २८||
SP1010291: कराभ्यां चरणाभ्यां च दंष्ट्राभिश्च विदारयन्|
SP1010292: तन्मुक्तैरायुधैश्चापि चिच्छेदान्यान्ररास च|| २९||
SP1010301: ते सर्वे करचरणैः स्वमुक्तशस्त्रैर्दंष्ट्राभिर्नखमुखदारितास्तथैव|
SP1010302: संक्षीणा बहुभिरिवोपभुज्यमाना द्रव्याणामतिनिचयाः सदा महान्तः|| ३०||
SP1019999: इति स्कन्दपुराण एकोत्तरशतो ऽध्यायः||