Skandapurāṇa Adhyāya 99

E-text generated on July 20, 2022 from the original TeX files of: Bisschop, Peter C. and Yuko Yokochi, eds. The Skandapurāṇa. Vol. V. Adhyāyas 96-112. The Varāha Cycle and the Andhaka Cycle Continued. Critical Edition with an Introduction & Annotated English Synopsis, in cooperation with Sanne Dokter-Mersch and Judit Törzsök. Leiden: Brill, 2021. (SP V) https://brill.com/view/title/59532

SP0990010: सनत्कुमार उवाच|
SP0990011: स संप्रयातो धर्मात्मा नर्दमानो यथा घनः|
SP0990012: सर्वलोकमयो देवो वराहो नन्दिवर्धनः|
SP0990013: अपश्यत्सागरं चैव संप्राप्यातिमहाबलः|| १||
SP0990021: नर्दमानं यथा मेघं लीयमानं मृगेन्द्रवत्|
SP0990022: नर्तकीमिव नृत्यन्तं वल्गन्तं चैव योधवत्|| २||
SP0990031: मण्डलैर्बहुभिश्चित्रैश्चरन्तं वसुधां तथा|
SP0990032: नियुद्धकुशलं यद्वद्गदायुद्धविशारदम्|| ३||
SP0990041: तदा तं बहुधा चित्रमपश्यन्नन्दिवर्धनम्|
SP0990042: - - - - - - - -  - - - - - - - -|| ४||
SP0990051: स तमर्घेण देवेशं सर्वलोकमयं विभुम्|
SP0990052: पूजयामास देवाश्च ऋषयो ये च संगताः|| ५||
SP0990061: स जयाय प्रगृह्यैनमनुमान्य महोदधिम्|
SP0990062: निवर्त्य सर्वभूतानि प्रविवेश महार्णवम्|| ६||
SP0990071: विगाहमानः सक्रीडमर्णवं विबभौ विभुः|
SP0990072: सरः सुमहदासाद्य यथा मत्तो महागजः|| ७||
SP0990081: संप्रविश्य सुदूरं च सो ऽदृश्यः समपद्यत|
SP0990082: भूमिलेखावृतः सूर्यो यथा संपूर्णमण्डलः|| ८||
SP0990091: ततो ऽन्तर्जलमाविश्य क्षोभयानो महार्णवम्|
SP0990092: जलचन्द्रकवद्व्यास अदृश्यत जलौकसैः|| ९||
SP0990101: तिमींस्तिमिंगिलांश्चैव तिमिंगिलगिलानपि|
SP0990102: तथा वै तद्गिलानन्यान्हस्तिनो गर्दभानपि|| १०||
SP0990111: मकरांश्चैव शङ्खांश्च तथैवाश्वमुखानपि|
SP0990112: तथा वै पक्षिसंकाशान्मानुषानपि चापरान्|| ११||
SP0990121: रथचक्रप्रकारांश्च सिंहव्याघ्रमुखानपि|
SP0990122: शरभर्क्षविडालास्यान्मत्स्यान्बहुविधांस्तथा|
SP0990123: त्रासयन्स महातेजा जगाम सुमहाबलः|| १२||
SP0990131: कुतूहलात्समाविश्य केचिदाघ्राय चैव हि|
SP0990132: नश्यन्ति मत्स्या दीप्तास्याः शतशो ऽथ सहस्रशः|| १३||
SP0990141: स प्रदक्षिणमावृत्य दिव्यं हयशिरः शुभम्|
SP0990142: क्षणान्मैनाकमध्येन गत्वा भोगवतीमपि|| १४||
SP0990151: वरुणस्य पुरीं गत्वा पयोनाथस्य धीमतः|
SP0990152: पर्जन्यं दिग्गजं प्राप्य कृत्वा चापि प्रदक्षिणम्|| १५||
SP0990161: सुरभीपुरमासाद्य गां दृष्ट्वा चैव सुप्रभाम्|
SP0990162: या क्षरन्ती सदा व्यास सुधाममृतमेव च|| १६||
SP0990171: क्षीरोदं तत्सरो दिव्यं फेनपा यत्र ते द्विजाः|
SP0990172: तस्मिन्सरसि तत्पीत्वा पयो ऽमृतसमप्रभम्|
SP0990173: पूजितः फेनपैः सम्यक्तां रात्रिं तत्र सो ऽवसत्|| १७||
SP0990181: उषित्वा तत्र सो ऽगच्छत्कङ्कस्य पुरमव्ययम्|
SP0990182: वासुकेश्च पुरं प्राप्य तक्षकस्य च धीमतः|| १८||
SP0990191: ततः शेषस्य देवेशो विदितां रमणामिति|
SP0990192: रम्यां मनोज्ञां दिव्यां च स्वर्गादपि तां वराम्|| १९||
SP0990201: श्रुत्वानन्तश्च तं राजा अर्घेण च स पूजयत्|
SP0990202: प्रणम्य बहुमानाच्च उपामन्त्रयदव्ययः|| २०||
SP0990211: महत्कार्यमिदं देव कर्तव्यं त्रिदिवौकसाम्|
SP0990212: भूयो वयं त्वया सार्धं करिष्याम यदीच्छसि|| २१||
SP0990221: तं पूजयानं मधुहा प्रीत्या परमया युतः|
SP0990222: उवाच लोककार्यस्य न विघ्नं कर्तुमर्हसि|
SP0990223: मा च कालो ऽयमुद्युक्तो दैत्यस्य न भवेदिति|| २२||
SP0990230: सनत्कुमार उवाच|
SP0990231: ततो विसृज्य तं नागं रसातलमुपागमत्|
SP0990232: तत्र सागरको दैत्यः सुप्रभो ऽन्तर्जलेचरः|| २३||
SP0990241: अपश्यत्तं तदायान्तं हिरण्याक्षपुरं प्रति|
SP0990242: गात्रेषु देवान्सूक्ष्मांश्च वराहस्यान्ववैक्षत|| २४||
SP0990251: विस्मितश्चास्य रूपेण भयान्नैनमुपागमत्|
SP0990252: तेजसा चापि विष्टब्धो दुरात्मा तस्य सो ऽसुरः|| २५||
SP0990261: आविवेदयिषुस्तस्मै हिरण्याक्षाय सो ऽत्वरत्|
SP0990262: चक्रे वेगं प्रति पुरं वराहस्य तदाग्रतः|| २६||
SP0990271: स यातुकामो दितिजाधिराजं वराहरूपं तमनन्तमन्तकम्|
SP0990272: जगाम दैत्याय स जीवितान्तकं यथानिलः प्रच्युतदाममाल्यवान्|| २७||
SP0999999: इति स्कन्दपुराण एकोनशततमो ऽध्यायः||