Skandapurāṇa Adhyāya 88

E-text generated on February 12, 2019 from the original TeX files of: Peter C. Bisschop and Yuko Yokochi, eds. The Skandapurāṇa. Vol. IV. Start of the Skanda and Andhaka Cycles. Critical Edition with an Introduction & Annotated English Synopsis, in cooperation with Diwakar Acharya and Judit Törzsök. Leiden/Boston: Brill, 2018.

SP0880010: सनत्कुमार उवाच|
SP0880011: अर्यमा बहुभिर्बाणैः प्रह्लादं दैत्यपुंगवम्|
SP0880012: आजघान नदन्घोरं ध्वजं चास्य व्यशातयत्|| १||
SP0880021: प्रह्लादो ऽप्यर्यमन्तं वै रथं त्यक्त्वैव वीर्यवान्|
SP0880022: प्रदुद्राव यथा राहुः समये तिमिरापहम्|| २||
SP0880031: आधावन्तं च वेगेन विहस्तं रिपुमर्यमा|
SP0880032: जघान बहुभिर्बाणैः प्रह्लादं दैत्यपुंगवम्|| ३||
SP0880041: शरानगणयन्नेव हिरण्यकशिपोः सुतः|
SP0880042: क्रोधान्मानाच्च दर्पाच्च वेगेन समधावत|| ४||
SP0880051: गृहीत्वा कूबरे तस्य रथं हेमपरिष्कृतम्|
SP0880052: चिक्षेप सह सूतेन ततो हर्षान्ननाद च|| ५||
SP0880061: अनुह्लादो धरं प्राप्य तेन विद्धः स्तनान्तरे|
SP0880062: असिं निष्कृष्य वेगेन धरस्य रथमासदत्|| ६||
SP0880071: ध्वजमीषां हयांश्चैव सारथिं धनुरेव च|
SP0880072: छित्त्वा स्कन्धे धरं चैव पुनः स्वरथमभ्यगात्|| ७||
SP0880081: कर्मणा तेन दैत्यस्य धरो भयसमीरितः|
SP0880082: अनुह्लादं ततस्त्यक्त्वा ययाविन्दुरथं प्रति|| ८||
SP0880091: ध्रुवस्तु ह्रदमासाद्य कृत्वा युद्धं महाभयम्|
SP0880092: माययाभिजितो युद्धे प्राद्रवद्भयपीडितः|| ९||
SP0880101: एवमन्यैश्च दैत्येन्द्रैरन्ये देवा महाबलाः|
SP0880102: निर्जितास्तर्जिताश्चैव युद्धाय च पुनः स्थिताः|| १०||
SP0880111: ततः संकुलमेवाभूद्देवानां दानवैः सह|
SP0880112: परस्परजिगीषूणां युद्धं भीरुभयावहम्|| ११||
SP0880121: ततो भेर्यश्च शङ्खाश्च पटहाः सैकपुष्कराः|
SP0880122: झर्झर्यः पेपुकाश्चैव डिण्डिमा गोविषाणिकाः|
SP0880123: अवाद्यन्त बले व्यास उभयेषां सहस्रशः|| १२||
SP0880131: ततो ऽसृगोघप्रभवा पताकाध्वजपादपा|
SP0880132: गजाश्वग्राहबहुला रथप्रवरकच्छपा|| १३||
SP0880141: केशशैवालबहुला धनुर्ज्याकृततन्तुका|
SP0880142: निष्टनन्तोग्रमण्डूका दुकूलच्छत्रफेनिला|| १४||
SP0880151: उष्णीषवरहंसा च करपादशिरोपला|
SP0880152: हारकेयूरसिकता मुकुटोत्फुल्लपङ्कजा|| १५||
SP0880161: मनुष्यकफपङ्का च प्राणजीवितनाशनी|
SP0880162: प्रावर्तत नदी घोरा हस्त्यश्वरथवाहिनी|| १६||
SP0880171: तस्यां स्नायन्ति रक्षांसि पिबन्ति च रमन्ति च|
SP0880172: नृत्यन्ते चापि विविधा भीरूणां भयदास्तदा|| १७||
SP0880181: गृध्रा गोमायवश्चैव शुनो जर्जरवायसाः|
SP0880182: चक्षूंषि करपादान्त्रान्भक्षयन्तो दिने दिने|| १८||
SP0880191: ममायं हस्तिनः पादो ममायं मेदपट्टकः|
SP0880192: ममायं च करः शुभ्रो ह्रदश्च रुधिरस्य ह|| १९||
SP0880201: ममायं तव नायं च गृह्ण पश्येति चैव हि|
SP0880202: कलहं चक्रिरे तत्र क्रूराः पिशितभोजनाः|| २०||
SP0880211: त्यक्त्वान्ये च हतास्तत्र स्वदेहान्सुमहारथाः|
SP0880212: विमानैः स्त्रीजनाकीर्णैः प्रययुर्ब्रह्मणः सदम्|| २१||
SP0880221: अपरे पापकर्माणो हन्यमाना रुषान्वितैः|
SP0880222: पतन्ति नरके घोरे क्रन्दमाना मुहुर्मुहुः|| २२||
SP0880231: केचिदार्तस्वरं कृत्वा याचमानास्तृडार्दिताः|
SP0880232: म्रियन्ते पुरुषा युद्धे शतशो ऽथ सहस्रशः|| २३||
SP0880241: दशन्तश्च तृणान्यन्ये तात पुत्रेति चापरे|
SP0880242: क्रन्दमाना नरा भीताः प्राणान्कृच्छ्रेण तत्यजुः|| २४||
SP0880251: संदष्टौष्ठपुटाः केचिद्देवासुरमहारथाः|
SP0880252: शरसंभिन्नमर्माणः पतन्त्युर्व्यां द्रुमा इव|| २५||
SP0880261: अशिवानि शिवा नेदुरट्टहासांश्च राक्षसाः|
SP0880262: आर्तनादांश्च पुरुषास्तथैव गजवाजिनः|| २६||
SP0880271: सिंहनादाश्च शूराणां बाहुशब्दाश्च पुष्कलाः|
SP0880272: धनुषां कृष्यमाणानां शब्दो वाद्यरवस्तथा|| २७||
SP0880281: अथेन्द्रश्च धनेशश्च यमः कालश्च वीर्यवान्|
SP0880282: वरुणो मरुतश्चैव विश्वेदेवाश्च सर्वशः|| २८||
SP0880291: मित्रश्चैव जयन्तश्च भगः पूषार्यमा तथा|
SP0880292: कापाली चापि यो रुद्रो वसवश्च महाबलाः|
SP0880293: नासत्यश्चैव दस्रश्च पृश्नयश्च सुरोत्तमाः|| २९||
SP0880301: एते चान्ये च देवानां प्रवरा बाहुशालिनः|
SP0880302: दानवानां बले वेगं वेगवन्तो ऽभिचक्रिरे|| ३०||
SP0880311: सागरा इव गर्जन्तो युगान्ते अनला इव|
SP0880312: प्रभञ्जना इवाकाले महान्त इव चाचलाः|| ३१||
SP0880321: वृषभा इव नर्दन्तो बृंहन्त इव कुञ्जराः|
SP0880322: ग्रसन्तश्च यथा ग्राहाश्छिन्दन्तो मकरा इव|| ३२||
SP0880331: वर्षमाणा इव घनाः सिंहा इव च नर्दनाः|
SP0880332: दानवानां बलं सर्वे वेगेनैव व्यनाशयन्|| ३३||
SP0880341: तद्देववेगप्रहतातिवेगं बलं समन्ताद्दनुदानवानाम्|
SP0880342: भवत्यनाधारमतिप्रसक्तं तृणं यथा वह्निमुखावसक्तम्|| ३४||
SP0889999: इति स्कन्दपुराणे ऽष्टाशीतितमो ऽध्यायः||