Skandapurāṇa Adhyāya 83

E-text generated on February 12, 2019 from the original TeX files of: Peter C. Bisschop and Yuko Yokochi, eds. The Skandapurāṇa. Vol. IV. Start of the Skanda and Andhaka Cycles. Critical Edition with an Introduction & Annotated English Synopsis, in cooperation with Diwakar Acharya and Judit Törzsök. Leiden/Boston: Brill, 2018.

SP0830010: सनत्कुमार उवाच|
SP0830011: अथ ते दानवा व्यास निवृत्ता रणमूर्धनि|
SP0830012: दुष्करं तं तदा चक्रुर्वेगं नद्य इवार्णवे|| १||
SP0830021: प्रह्लादश्चानुह्लादश्च शिनिर्बाष्कल एव च|
SP0830022: विरोचनो बलिर्बाणो वलो वातो ऽथ कम्पनः|| २||
SP0830031: विप्रचित्तिश्च षण्डश्च ह्रदश्च सशतोदरः|
SP0830032: मयो ऽसुरश्च व्यंसश्च शतावर्तो ह्रदोदरः|| ३||
SP0830041: केशी च नमुचिश्चैव तथेन्द्रदमनो ऽसुरः|
SP0830042: मयो मुरस्तारकाक्षो विद्युन्माली प्रभाकरः|| ४||
SP0830051: तारश्च तारकश्चैव बकश्चाटिश्च विश्रुतः|
SP0830052: मूकश्चैव कुभश्चैव कार्तस्वरमहारवौ|| ५||
SP0830061: वातापी चेल्वलश्चैव तथैवेल्वकपिल्वकौ|
SP0830062: केतुश्च शतकेतुश्च राहुः स्वर्भानुरेव च|| ६||
SP0830071: शम्बरो नरकश्चैव कालशम्बर एव च|
SP0830072: दुन्दुभिर्महिषश्चैव शतदुन्दुभिरेव च|| ७||
SP0830081: कालनेमी विपाकश्च पाको दुर्योधनस्तथा|
SP0830082: हस्ती सुन्दनिसुन्दौ च शरभः काल एव च|| ८||
SP0830091: वृषपर्वा शतानन्दः शतावर्तो ऽथ धेनुकः|
SP0830092: प्रलम्बश्च ध्वजश्चैव गणो हालाहलस्तथा|| ९||
SP0830101: सैंहिकेयाश्च विख्याताः पौलोमाः कालकासुताः|
SP0830102: निवातकवचाश्चैव बालेयश्च तथा गणः|| १०||
SP0830111: बाणस्य च सुताः सर्वे कालकञ्जाश्च विश्रुताः|
SP0830112: वृतो वृत्तश्च सगणस्तथान्ये सुमहाबलाः|| ११||
SP0830121: तस्य सैन्यस्य विप्रेन्द्र नर्दतः संबभौ तदा|
SP0830122: वेगः स सिन्धुराजस्य वेलां प्रति यथा महान्|| १२||
SP0830131: वादित्ररवसंमिश्रैः सिंहनादैः सुपुष्कलैः|
SP0830132: रथनेमिहयानां च गजानां बृंहितैः सह|
SP0830133: स शब्दस्तुमुलो व्यास त्रैलोक्यमवपूरयत्|| १३||
SP0830141: देवापि हि सुसंयत्ताः सर्वोद्योगेन संस्थिताः|
SP0830142: प्रत्यगृह्णन्त तान्दैत्यान्क्रोधताम्रायतेक्षणाः|| १४||
SP0830151: असिभिः पात्यमानैश्च शतघ्नीभिश्च सर्वशः|
SP0830152: उल्काभिरिव तद्व्योम विचित्रमभवत्तदा|| १५||
SP0830161: शरासिभिर्निकृत्तानि पतन्त्युर्व्यां शिरांसि तु|
SP0830162: तालेभ्य इव पक्वानि फलानि मुनिसत्तम|| १६||
SP0830171: मुकुटैर्हारकेयूरैः श्रोणीसूत्रैश्च सप्रभैः|
SP0830172: निष्कैर्दुकूलैः कटकैरङ्गुलीयैः सकुण्डलैः|| १७||
SP0830181: उरच्छदैः कङ्कटीभिः करपालैश्च दन्तिनाम्|
SP0830182: व्यजनैस्तालवृन्तैश्च छत्त्रैर्मणिभिरेव च|| १८||
SP0830191: पट्टैश्च काञ्चनैर्दिव्यैः कवचैश्च महाप्रभैः|
SP0830192: शिरोभिश्चरणैश्चैव करैर्वस्त्रैर्महाप्रभैः|| १९||
SP0830201: प्रतोदैश्च कुथाभिश्च योक्त्रैश्च कनकोज्ज्वलैः|
SP0830202: तत्र युद्धावनिर्भाति ताराभिर्द्यौरिवापरा|| २०||
SP0830211: तिष्ठ तिष्ठ क्व मे यासि नास्ति मोक्षस्तवाद्य वै|
SP0830212: स्थितो ऽहं प्रहरस्वेति न मे भीस्तिष्ठ मे ऽग्रतः|| २१||
SP0830221: किं गर्जसि वृथा व्योम्नि शरदीव बलाहकः|
SP0830222: कर्मणा दर्शय क्षिप्रं गर्जितं ते ऽद्य निष्फलम्|
SP0830223: नैवं प्रह्रियते मूढ मां वीक्षस्व दृढो भव|| २२||
SP0830231: तिष्ठ तिष्ठ क्व गन्तासि मम हत्वा प्रियं सुतम्|
SP0830232: स्थितो ऽस्म्येष नयिष्यामि त्वामप्यद्य यमालयम्|| २३||
SP0830241: अद्य ते ऽमरतां सर्वां देवाधम सुदुःसहाम्|
SP0830242: नाशयिष्यन्ति मद्बाणास्तिष्ठ तिष्ठ ममाग्रतः|
SP0830243: दानवाधम देवो ऽस्मि नास्मि भीतस्तवाहवे|| २४||
SP0830251: एवं वदन्तो युयुधुर्यथा मत्ता महागजाः|
SP0830252: परस्परवधे सक्ता योधास्तत्र सहस्रशः|
SP0830253: अन्यो ऽन्यमेवमाभाष्य प्रेषयद्यमसादनम्|| २५||
SP0830261: सिद्धाश्च चारणाश्चैव व्योम्नि सर्वे व्यवस्थिताः|
SP0830262: साधयन्ति रमन्ते च नदन्ते च यथाम्बुदाः|| २६||
SP0830271: ममायं दानवः संख्ये हतो भर्ता विनिर्मितः|
SP0830272: अयं देवस्तव पतिर्मा पारक्ये मनः कृथाः|| २७||
SP0830281: किमेवं लोभयुक्तासि श्रेष्ठं श्रेष्ठं परीक्षसे|
SP0830282: स्वयंग्राहो न हीहास्ति लेख्यं वाचय मा त्वरीः|| २८||
SP0830291: असंतोषो मतः कस्ते संतुष्टा भव सुन्दरि|
SP0830292: भागो यस्ते सुरैर्दत्तं तं गृहीत्वा व्रजानघे|| २९||
SP0830301: एवमप्सरसश्चात्र वदन्ति च हसन्ति च|
SP0830302: समरे निहतान्योधान्कुर्वन्ति कलहं तथा|| ३०||
SP0830311: मेखलावलयोन्मिश्रं तासां तत्कलभाषितम्|
SP0830312: श्रुत्वा श्रुत्वा च ते योधा युयुधुर्भयवर्जिताः|
SP0830313: वल्गितास्फोटिताश्चैव दिशः सर्वा व्यनादयन्|| ३१||
SP0830321: तत्प्रवादितगजोपबृंहितं वल्गिताकुपितसिंहनादितम्|
SP0830322: देवदानवभयप्रवर्तनं जीवितान्तकरमाबभौ रणम्|| ३२||
SP0839999: इति स्कन्दपुराणे त्र्यशीतितमो ऽध्यायः||