Skandapurāṇa Adhyāya 62

E-text generated on February 22, 2017 from the original TeX files of: Yokochi, Yuko, ed. The Skandapurāṇa. Vol.III. Adhyāyas 34.1-61, 53-69. The Vindhyavāsinī Cycle. Critical Edition with an Introduction & Annotated English Synopsis. Leiden/Groningen: Brill & Egbert Forsten, 2013.

SP0620010: सनत्कुमार उवाच|
SP0620011: अथ निर्जित्य दैत्येन्द्रौ दिवं विक्रमशालिनौ|
SP0620012: जग्मतुः सहितौ दैत्यैर्विन्ध्यं तुङ्गशिलोच्चयम्|| १||
SP0620021: सम्पूज्य विधिवद्दैत्यान्प्रस्थाप्य भ्रातरौ तदा|
SP0620022: रेमाते विन्ध्यपादेषु फुल्लपादपसानुषु|| २||
SP0620031: दैत्याभ्यामथ विज्ञाय ब्रह्मा सुरपराभवम्|
SP0620032: विचिन्त्यैकमनाः सम्यग्वधोपायं तयोस्तदा|| ३||
SP0620041: तिलं तिलं समादाय रत्नेभ्यश्चारुदर्शनाम्|
SP0620042: ससर्ज कमनीयाङ्गीमङ्गनां वल्गुनिस्वनाम्|| ४||
SP0620051: तिलोत्तमेति तस्याश्च नाम चक्रे पितामहः|
SP0620052: दिव्यानामपि सा स्त्रीणामुपमेव तदा बभौ|| ५||
SP0620061: अतिसंपूर्णवक्त्रां तामतीन्दीवरलोचनाम्|
SP0620062: अतिहंसस्वनालापामतिमत्तेभगामिनीम्|| ६||
SP0620071: लक्ष्मी निरीक्ष्य सव्रीडा पङ्कजेनावृणोन्मुखम्|
SP0620072: वपुर्भिः स्वैश्च चार्वङ्ग्यां त्रेपुरुद्यानदेवताः|| ७||
SP0620081: तामुत्पाद्य ततो धाता पाकशासनमब्रवीत्|
SP0620082: शम्भुना मदनः पूर्वं निर्दग्धो लोचनाग्निना|| ८||
SP0620091: तस्य प्रोद्भूतये यामः सर्वे पार्श्वं पिनाकिनः|
SP0620092: तमाराध्य तथा कुर्मो यथा स्यान्मदनः पुनः|| ९||
SP0620101: अथ ते ब्रह्मणा सार्धं तया चासुरविद्विषः|
SP0620102: जग्मुर्विन्ध्यगिरेः शृङ्गं यत्रास्ते भगवान्हरः|| १०||
SP0620111: तत्र शर्वमपश्यन्तो दध्युस्ते सुरसत्तमाः|
SP0620112: गृणन्तः प्रणवं सर्वे शिवसंन्यस्तचेतसः|| ११||
SP0620121: अथ लिङ्गं समुत्तस्थौ तेषां मध्ये दिवौकसाम्|
SP0620122: सुसंहतं सुसंश्लिष्टं समूहस्तेजसामिव|| १२||
SP0620131: उच्चचार तदा तस्मादुच्चैर्वाग्विशदाक्षरा|
SP0620132: निर्दग्धो ऽयं मया पापस्तपस्विजनकण्टकः|| १३||
SP0620141: युष्मदर्थे विमोक्ष्यामि कार्यं वो यः करिष्यति|
SP0620142: करोतु परितश्चेयं मां प्रदक्षिणमङ्गना|| १४||
SP0620151: एवमुक्ता महेशेन सा चकार प्रदक्षिणम्|
SP0620152: संनिधायाञ्जलिं मूर्ध्नि रक्तेन्दीवरकोमलम्|| १५||
SP0620161: नेमे मूर्तिं तदा पूर्वां निःससार ततो मुखम्|
SP0620162: त्र्यक्षं प्रसन्नं बिम्बौष्ठममितद्युतिकान्तिमत्|| १६||
SP0620171: अथ तेजो विनिःसृत्य वदनेन्दोः पिनाकिनः|
SP0620172: तां विवेशाङ्गनामाशु शरद्भास्करभास्वरम्|| १७||
SP0620181: अथ सा दक्षिणां मूर्तिं प्रणेमे चारुदर्शना|
SP0620182: निर्जगाम तदा दीप्तं मुखं सुरगुरोस्ततः|| १८||
SP0620191: वारिभारालसाम्भोदरुचिमद्भीमनिस्वनम्|
SP0620192: करालदशनोद्भासि दीप्तरक्तान्तलोचनम्|| १९||
SP0620201: अत्यादित्यं ततस्तेजो मुखान्निःसृत्य दक्षिणात्|
SP0620202: दृश्यमानं सुरैः सर्वैर्विवेश प्रमदोत्तमाम्|| २०||
SP0620211: प्रणेमे सा ततस्तस्य पश्चिमां मूर्तिमञ्जसा|
SP0620212: निश्चक्राम ततस्तस्या मुखं त्र्यक्षमनुत्तमम्|| २१||
SP0620221: ततस्तेजो विनिःसृत्य मुखेन्दोर्मदनद्विषः|
SP0620222: दीप्यमानं विवेशाशु तामेव प्रमदोत्तमाम्|| २२||
SP0620231: उत्तरां मूर्तिमागम्य प्रणेमे सा कृताञ्जलिः|
SP0620232: तस्या मुखं सुसंपूर्णं सुप्रसन्नं विनिर्ययौ|| २३||
SP0620241: तस्मात्तेजो विनिःसृत्य सूर्यदीप्तानलप्रभम्|
SP0620242: विवेश प्रमदामाशु तामेव वरवर्णिनीम्|| २४||
SP0620251: मुखानि देवदेवस्य सुराणामर्थसिद्धये|
SP0620252: चत्वारि निर्ययुर्दिक्षु न तस्या रूपविस्मयात्|| २५||
SP0620261: आत्मसंस्थं पुरा तेजो दग्ध्वा यन्मदनं कृतम्|
SP0620262: अनुजग्राह देवेशस्तेन तां प्रमदोत्तमाम्|| २६||
SP0620271: अब्रवीच्च सुरान्सर्वांस्तत्रेदं वचनं शिवः|
SP0620272: यस्मादियं मां यूयं च मण्डलेन प्रदक्षिणम्|| २७||
SP0620281: चक्रे सर्वे सुरश्रेष्ठाः स्थानं तस्मादिदं मम|
SP0620282: भविष्यति गिरौ विन्ध्ये मण्डलेश्वरसंज्ञितम्|
SP0620283: सांनिध्यं सर्वदा ह्यस्मिन्करिष्यामि वरप्रदम्|| २८||
SP0620291: मण्डलेश्वरमीशानं दृष्ट्वा तु प्रयतो नरः|
SP0620292: अश्वमेधफलं प्राप्य मम लोकमवाप्स्यति|| २९||
SP0620301: नैकसिद्धशताकीर्णं किंनरोरगसेवितम्|
SP0620302: युष्माभिः सर्वदा युक्तं भविष्यति मम प्रियम्|| ३०||
SP0620311: एषा तिलोत्तमा चैव यदर्थं सुरसत्तमाः|
SP0620312: सृष्टा युष्माभिरव्यग्रा तद्वः कार्यं करिष्यति|| ३१||
SP0620321: एतामवेक्ष्य तौ दैत्यौ मोहितौ मदनार्दितौ|
SP0620322: अन्योन्यं यास्यतो नाशमेषा चैव भविष्यति|| ३२||
SP0620331: अजरा चामरा चैव सर्वाप्सरवरा शुभा|
SP0620332: पूज्या चेह सदा स्थाने वन्द्या चैव भविष्यति|| ३३||
SP0620340: सनत्कुमार उवाच|
SP0620341: एवमुक्ते महेशेन सुराः सुप्रीतचेतसः|
SP0620342: तां स्त्रियं प्रेषयामासुर्वधार्थं दैत्ययोस्तदा|| ३४||
SP0620351: सहायान्प्रददौ चास्यै ब्रह्मा कमलवाहनः|
SP0620352: क्रोधं दर्पमृतून्सर्वान्रागं मदनमेव च|
SP0620353: कालं मृत्युं च मोहं च विषादं चामितद्युतिः|| ३५||
SP0620361: अथ सम्प्रेषयित्वा तु देवतास्तां तिलोत्तमाम्|
SP0620362: आत्मानं पिण्डयामासुर्देवास्ते सर्व एव हि|| ३६||
SP0620371: कः कः कतम आयात इहाद्येति सुरर्षभाः|
SP0620372: ततो मध्ये स्थितं भूयस्ते ऽपश्यन्परमेश्वरम्|| ३७||
SP0620381: पिण्ड्यमानेषु देवेषु यस्मान्मध्ये समास्थितः|
SP0620382: पिण्डारेश्वर इत्येव तत्रासावभवत्ततः|| ३८||
SP0620391: पिण्डारेश्वरमीशानं दृष्ट्वा भक्त्या तु मानवः|
SP0620392: सर्वाशुभविनिर्मुक्तो देहभेदे गणो भवेत्|| ३९||
SP0620401: ततस्ते देवताः सर्वे कृत्वा कार्यमतन्द्रिताः|
SP0620402: प्रणम्य परमेशानं स्वानि सद्मानि भेजिरे|| ४०||
SP0620411: सापि चारुमुखापाङ्गी पीनोन्नतपयोधरा|
SP0620412: आक्षिपन्तीव चेतांसि सुराणां विभ्रमैस्तदा|
SP0620413: प्रतस्थे दक्षिणामाशामासाते यत्र दानवौ|| ४१||
SP0620421: विन्ध्यपादेषु रम्येषु विहगोद्गीतसानुषु|
SP0620422: भ्रमन्तावथ दैत्येन्द्रौ स्थितां ददृशतुस्तु ताम्|| ४२||
SP0620431: अशोकशाखामुत्फुल्लामालम्ब्योन्मत्तषट्पदाम्|
SP0620432: वसानामंशुकं चित्रमालम्ब्य मणिमेखलाम्|| ४३||
SP0620441: गायन्तीं मधुरं रक्तं समं कलमनाकुलम्|
SP0620442: तारमन्द्रातितारैश्च स्वरैः सम्यगलंकृतम्|| ४४||
SP0620451: साक्षादिव तपःसिद्धिं श्रियं मूर्तिमतीमिव|
SP0620452: प्राप्तामिव रतिं साक्षात्कान्तिं चान्द्रमसीमिव|| ४५||
SP0620461: ममैवेयं ममैवेयमिति तौ दानवोत्तमौ|
SP0620462: अभिसृत्य शुभां देवीं पाण्योर्जगृहतुः समम्|| ४६||
SP0620471: अथ दर्पमदक्रोधमात्सर्याविष्टचेतसौ|
SP0620472: तौ चुक्रुधतुरत्यर्थमन्योन्यस्यासुरोत्तमौ|| ४७||
SP0620481: तयोर्गदे ऽन्तकः कालो मृत्युश्चाविविशुर्द्रुतम्|
SP0620482: प्रगृह्याथ गदे क्रुद्धावन्योन्यमभिजघ्नतुः|| ४८||
SP0620491: अथैकैकेन तौ तत्र प्रहारेणाभिताडितौ|
SP0620492: विषण्णस्थितसर्वाङ्गौ शिवशापविमोहितौ|
SP0620493: विसंज्ञौ पतितौ भूमौ छिन्नमूलाविव द्रुमौ|| ४९||
SP0620501: अथ निर्ययतुस्तत्र कामोपहतचेतसोः|
SP0620502: आत्मानौ सह शुक्रेण तयोर्दानवमुख्ययोः|| ५०||
SP0620511: तौ तदा निर्गतौ तत्र तयोर्जीवौ दुरात्मनोः|
SP0620512: बलिनौ चारुसर्वाङ्गौ बालावाशु बभूवतुः|| ५१||
SP0620521: एकस्तत्राब्रवीद्बालः सुम्भो ऽहं द्विषतामिति|
SP0620522: निसुम्भो ऽप्यहमन्यस्तु बालस्तत्रावदत्तदा|| ५२||
SP0620531: अथ विन्ध्यः समासाद्य बालौ तावमितद्युती|
SP0620532: आदिदेशात्मनः पत्नीं पाहि त्वं बालकाविति|| ५३||
SP0620541: ववृधाते ऽथ तौ तत्र दानवेन्द्रसुतावुभौ|
SP0620542: कृष्णपक्षक्षये यद्वद्युगपच्छशिसागरौ|| ५४||
SP0620551: बुद्ध्वा तौ च तदा जन्म दानवाभ्यामरिंदमौ|
SP0620552: तपश्चेरतुरत्युग्रं पर्णाम्बुपवनाशनौ|| ५५||
SP0620561: तपसाराधितस्ताभ्यां तत्रागत्याब्रवीत्प्रभुः|
SP0620562: तुष्टो ऽस्मि युवयोः पुत्रौ वरं किं वा ददाम्यहम्|| ५६||
SP0620571: वव्राते तौ वरं वीरावजय्यावध्यतां सदा|
SP0620572: प्रार्थनां तां तयोः श्रुत्वा प्रत्युवाच पितामहः|| ५७||
SP0620581: अवश्यं युवयोरेष्यं मरणं येन केनचित्|
SP0620582: सुरेभ्यो ऽन्यत्र दैत्येन्द्रावमरत्वं न विद्यते|| ५८||
SP0620591: इत्युक्तवन्तं ब्रह्माणं वव्राते दानवौ वरम्|
SP0620592: उभावपि सुनिश्चिन्त्य सम्प्रहृष्टतनूरुहौ|| ५९||
SP0620601: जगन्मातैव या कन्या विना तस्याः पितामह|
SP0620602: मा भूतामावयोर्देव सदा मृत्युपराजयौ|| ६०||
SP0620611: एवमस्त्विति तौ प्रोच्य दैत्येन्द्रतनयावुभौ|
SP0620612: विश्वस्य जगतः स्रष्टा तत्रैवान्तरधीयत|| ६१||
SP0620621: अथ तौ तपसस्तीव्राद्विरम्य कृतमङ्गलौ|
SP0620622: मौलिनौ बद्धकेयूरौ हाराङ्गदविभूषितौ|| ६२||
SP0620631: हरिचन्दनदिग्धाङ्गौ पीतकौशेयवाससौ|
SP0620632: विन्ध्यप्रस्थेषु रम्येषु चेरतुर्दानवोत्तमौ|| ६३||
SP0620641: पितामहाद्वरप्राप्तिं श्रुत्वा सुम्भनिसुम्भयोः|
SP0620642: आजग्मुर्दानवा हृष्टाः पातालतलवासिनः|| ६४||
SP0620651: शम्भुर्मयो घनः केशिर्नरको नमुचिर्द्रुमः|
SP0620652: अन्ये च कोटिशो दृप्ता हतशेषाः सुरद्विषः|| ६५||
SP0620661: विन्ध्यप्रस्थे निषेदुस्ते समेताः सर्वदानवाः|
SP0620662: नानाद्रुमलतागुल्मविकीर्णकुसुमोत्करे|| ६६||
SP0620671: धन्विनो बद्धनिस्त्रिंशाश्चित्राभरणभूषिताः|
SP0620672: सेन्द्रचापास्तडित्वन्तो नभसीव बलाहकाः|| ६७||
SP0620681: अथोवाच मयस्तत्र दानवो दानवोत्तमौ|
SP0620682: पितृभ्यां युवयोर्भुक्तं त्रैलोक्यमखिलं पुरा|| ६८||
SP0620691: युवाभ्यामधुना दैत्यौ कस्मान्नादीयते पुनः|
SP0620692: समेतानमरान्सर्वान्निर्जित्य रणमूर्धनि|| ६९||
SP0620701: ये सहाया हि वां पित्रोर्बभूवुः सुरविद्विषः|
SP0620702: त एवामी बलोन्मत्ताः सहाया युवयोर्युधि|| ७०||
SP0620711: इत्युक्तवति दैत्येन्द्रे मये सुम्भो महासुरः|
SP0620712: निसुम्भस्य मुखं प्रेक्ष्य वाक्यमित्थं तदाब्रवीत्|| ७१||
SP0620721: भूर्लोकमखिलं दैत्या युष्माभिः सह साम्प्रतम्|
SP0620722: संविभज्य सुरान्सर्वाञ्जेष्यामो रणमूर्धनि|| ७२||
SP0620731: जम्बूद्वीपं स्वयं सो ऽथ जग्राहासुरसत्तमः|
SP0620732: शाकद्वीपं निसुम्भाय ददौ भ्रात्रे कनीयसे|| ७३||
SP0620741: शाल्मलिद्वीपगोमेदौ दानवेभ्यो ददौ प्रभुः|
SP0620742: क्रौञ्चद्वीपकुशद्वीपौ दैत्येभ्यः प्रददौ च सः|
SP0620743: दैत्येन्द्रः पुष्करद्वीपं भार्गवाय न्यवेदयत्|| ७४||
SP0620751: एवं प्रतिविभज्याशु भूर्लोकमखिलं तदा|
SP0620752: इज्याञ्जलिनमस्कारान्यज्ञान्सर्वाश्च सत्क्रियाः|
SP0620753: आच्छिद्य देवतेभ्यस्ते जगृहुर्दैत्यदानवाः|| ७५||
SP0620761: बभूवाथ ततो यज्ञः कश्यपस्य महात्मनः|
SP0620762: आगत्य तं तदा यज्ञं ममृदुः सुरशत्रवः|| ७६||
SP0620771: आधिपत्यं हि नः कृत्स्ने भूर्लोके कश्यपाधुना|
SP0620772: सर्वावस्थासु यज्ञे ऽस्मिन्नस्मांस्त्वं यष्टुमर्हसि|| ७७||
SP0620781: एवमुक्तस्ततो दैत्यैर्मारीचः कश्यपस्तदा|
SP0620782: गम्भीरमर्थवद्वाक्यमुवाचेत्थं स्मयन्निव|| ७८||
SP0620791: त्रैलोक्यमात्मनः कृत्वा जित्वा सर्वामरान्रणे|
SP0620792: यज्ञभागांस्ततो दैत्याः सर्वानादातुमर्हथ|| ७९||
SP0620801: एवमुक्तास्तदा तेन दैत्यदानवसत्तमाः|
SP0620802: बलं सर्वं समानाय्य कृत्वा संग्रामिकीः क्रियाः|| ८०||
SP0620811: प्रशस्तेषु कृताचारा मुहूर्तर्क्षदिनेषु ते|
SP0620812: रथैर्नागैस्तुरंगैश्च निर्ययुर्दैत्यदानवाः|| ८१||
SP0620821: पृष्ठतः पुरतः सम्यक्पार्श्वयोरुभयोरपि|
SP0620822: विधाय रक्षां संयत्ता ययुर्देवाञ्जिगीषवः|| ८२||
SP0620831: तेषामागमनं ज्ञात्वा द्विषतां पाकशासनः|
SP0620832: संहतानां सुसंयत्तो युधा नाकं जिगीषताम्|| ८३||
SP0620841: विधिं विधाय स्वपुरे समस्तं दौर्गकर्मिकम्|
SP0620842: पुण्येषु तिथिनक्षत्रमुहूर्तकरणेषु सः|| ८४||
SP0620851: मुनीन्विधिवदभ्यर्च्य नमस्कृत्वा पिनाकिने|
SP0620852: सार्धं सुरगणैः सर्वैर्निर्ययौ कृतमङ्गलः|| ८५||
SP0620861: हिमवच्छिखराकारं चतुर्दन्तमनेकपम्|
SP0620862: आरुह्यैरावतं शश्वन्मदतोयौघवर्षिणम्|| ८६||
SP0620871: महता हेमदण्डेन रत्नांशुपरिवेषिणा|
SP0620872: उच्छ्रितेनातपत्रेण ध्रियमाणेन भास्वता|| ८७||
SP0620881: वीज्यमानः शरच्चन्द्रकिरणोत्करनिर्मलैः|
SP0620882: चामरै रत्नदण्डांशुसमूहखचितोदरैः|| ८८||
SP0620891: आशीभिर्जयशब्दैश्च मुनिभिः परिवर्धितः|
SP0620892: अभितः स्तूयमानश्च सूतमागधवन्दिभिः|| ८९||
SP0620901: अथावकाशे विस्तीर्णे समे पादपवर्जिते|
SP0620902: रचयामास देवानां पद्मव्यूहं बृहस्पतिः|| ९०||
SP0620911: मरुद्भिः सहितं कृत्वा कर्णिकायां शतक्रतुम्|
SP0620912: पत्रेषु च वसून्रुद्रानादित्यांश्च न्यवेशयत्|| ९१||
SP0620921: केसरेषु यमं कालं कुबेरवरुणावपि|
SP0620922: अनन्तं सहितं नागैर्नाले गुरुरकल्पयत्|| ९२||
SP0620931: देवानन्यान्समेतांश्च रक्षोगन्धर्वसेनया|
SP0620932: पुरःसरान्स पद्मस्य परितः पर्यकल्पयत्|| ९३||
SP0620941: अथ दानवतूर्याणां शब्दं श्रुत्वा दिवौकसः|
SP0620942: आजघ्नुर्मुदिता भेरीर्नेदुर्नादांश्च सङ्घशः|| ९४||
SP0620951: विमिश्रं तूर्यशब्देन श्रुत्वा नादं दिवौकसाम्|
SP0620952: संयत्ताः सुतरां चक्रुः प्रयत्नं दानवेश्वराः|| ९५||
SP0620961: अथ ते दानवा दृष्ट्वा पद्मव्यूहं दिवौकसाम्|
SP0620962: पप्रच्छुर्भार्गवं तत्र तद्भेदममितौजसः|| ९६||
SP0620971: स पृष्टो दानवश्रेष्ठैर्व्यूहभेदमनाकुलः|
SP0620972: विचिन्त्य भार्गवो धीमानित्थमाहासुरांस्तदा|| ९७||
SP0620981: विकीर्णाः परितः सर्वे तुषारनिकरा इव|
SP0620982: पद्मव्यूहं सुरेन्द्राणां हत सम्यक्सुरद्विषः|| ९८||
SP0620991: एवमुक्तास्ततो दैत्या भार्गवेण महात्मना|
SP0620992: सिंहनादं विनद्याशु परितस्ते ऽभ्यसर्पत|| ९९||
SP0621001: ततो युद्धं समभवद्देवदानवसैन्ययोः|
SP0621002: आयुधैर्विविधैस्तीक्ष्णैः परस्परमभिघ्नतोः|| १००||
SP0621011: सादिनः सादिभिः सार्धं नागा नागै रथा रथैः|
SP0621012: पत्तयः पत्तिभिर्दृप्तैर्दृप्ताः संयुयुधुर्युधि|| १०१||
SP0621021: केचिद्विभिन्ना नाराचैश्छिन्नाः केचित्परश्वधैः|
SP0621022: निपेतुर्व्यसवो योधाः सेनयोरुभयोरपि|| १०२||
SP0621031: छिन्धि भिन्धि सहेदानीं तिष्ठ मूढ क्व गच्छसि|
SP0621032: इति वाचः समुत्तस्थुर्युधि योधैरुदीरिताः|| १०३||
SP0621041: वसारुधिरसंसिक्तं तनुत्रावरणाचितम्|
SP0621042: हतनागाश्वकलिलं तद्बभूव रणाजिरम्|| १०४||
SP0621051: अथ ते दानवैस्तत्र पीड्यमाना दिवौकसः|
SP0621052: सव्रणा हतभूयिष्ठाः शक्रमेवाभिसंश्रिताः|
SP0621053: अनन्तं नागमुख्याश्च कुबेरं यक्षराक्षसाः|| १०५||
SP0621061: भिन्ने व्यूहे ऽथ देवानां प्रहृष्टा दैत्यदानवाः|
SP0621062: सिंहनादान्विनद्योच्चैस्तूर्याण्याहत्य भूयशः|
SP0621063: अभ्यद्रवत संयत्ताः समरे पाकशासनम्|| १०६||
SP0621071: अथोत्थाप्य गजं शक्रो वज्रेण शतपर्वणा|
SP0621072: चूर्णयामास संक्रुद्धो दैत्यदानववाहिनीम्|| १०७||
SP0621081: ददाह दानवानीकं परितः पाकशासनः|
SP0621082: निदाघसमये दीप्तः शुष्ककक्षमिवानलः|| १०८||
SP0621091: अथ सुम्भः समभ्येत्य समरे शक्रमब्रवीत्|
SP0621092: दृष्टो ऽस्यद्य मया शक्र न जीवन्प्रतियास्यसि|| १०९||
SP0621101: अथागत्य तदा ब्रह्मा प्राहेत्थं सुरसत्तमान्|
SP0621102: न योद्धव्यं सुरा दैत्यैरवध्या वः सुरद्विषः|| ११०||
SP0621111: अन्तर्दधुस्ततस्तस्य वाक्यं श्रुत्वा दिवौकसः|
SP0621112: विहाय समरं सर्वे क्षिप्रं सबलवाहनाः|| १११||
SP0621121: अथ दैत्याः सुसंहृष्टास्तूर्याण्याहत्य सर्वशः|
SP0621122: नेदुरुच्चैर्वचश्चेदमूचुः समरशालिनः|| ११२||
SP0621131: तुरगखुरपुटान्तक्षुण्णरेण्वन्धकारे
SP0621132: द्विरदरथनिनादत्रस्तपादातवृन्दे|
SP0621133: विगतभयविषादः संयुगे सुम्भसिंहो
SP0621134: जयति सुरविजेता वारिवाहोरुनादः|| ११३||
SP0621141: तदनु जयति दीर्घः पीनबाहूरुपादः 
SP0621142: पृथुरुचिरसुवक्षा उन्नतांसः सुनेत्रः|
SP0621143: मृगपतिसमगामी तोयदध्वाननादी
SP0621144: अमरवरविजेता दैत्यनाथो निसुम्भः|| ११४||
SP0629999: इति स्कन्दपुराणे द्विषष्टो ऽध्यायः||