Skandapurāṇa Adhyāya 49

E-text generated on February 22, 2017 from the original TeX files of: Bakker, Hans T., Peter C. Bisschop and Yuko Yokochi, eds. The Skandapurāṇa. Vol. IIB. Adhyāyas 31-52. The Vāhana and Naraka Cycles. Critical Edition with an Introduction & Annotated English Synopsis, in cooperation with Nina Mirnig and Judit Törzsök. Leiden/Boston: Brill, 2014.

SP0490010: सुशर्मोवाच|
SP0490011: तमस्तमतरं घोरं नरकं शृणु मे पुनः|
SP0490012: प्रकाशो यत्र नैवास्ति नैव दृष्टिः प्रवर्तते|| १||
SP0490021: पतन्नेव नरस्तत्र विसंज्ञः क्रियते ऽशुभः|
SP0490022: राक्षसैर्विकृताकारैस्तमस्तेन स चोच्यते|| २||
SP0490031: तत्रासौ पतितो मूढो वह्निना दह्यते भृशम्|
SP0490032: मृतो वेगादुत्थितश्च दृष्टिहीनो विचेतनः|
SP0490033: छिद्यते भिद्यते चैव राक्षसैः क्रूरकर्मभिः|| ३||
SP0490041: तस्मादपि तथैवार्तः सो ऽन्यं देशं प्रपद्यते|
SP0490042: तत्रापि निगृहीतस्तैः पशुमारेण वध्यते|| ४||
SP0490051: ततो भूयश्च कूपेषु क्षिप्तो दुर्गेष्वचेतनः|
SP0490052: निमग्नश्चाग्निकारीष्यां निष्कूजन्सो ऽभिजायते|| ५||
SP0490061: एवं स यातना बह्वीस्त्वनुभूय सुदुःखितः|
SP0490062: नरकान्तमनुप्राप्य उच्छ्रयेष्वभिपात्यते|| ६||
SP0490071: गर्भपातनकारश्च राज्यकामश्च यो भवेत्|
SP0490072: इहैवानर्हमानो ऽसौ भृत्यो राजवधे रतः|| ७||
SP0490081: अनाचार्यश्च यः कर्म आचार्याणां प्रपद्यते|
SP0490082: शास्त्रविद्यौषधीनां च गदानामगदैः सह|
SP0490083: यो विनाशयिता कश्चिद्यः प्रशंसति दानवान्|| ८||
SP0490091: उपदेशं च यो द्वेषादाचार्यो न प्रयच्छति|
SP0490092: स याति नरकं घोरं दुस्तरं तं तमोमयम्|| ९||
SP0490101: कृतघ्नं तु समादाय नरकाः सर्व एव ते|
SP0490102: यमं प्रणम्य ब्रुवते सह तैर्यमकिंकरैः|| १०||
SP0490111: भगवन्न वयं शक्ताः पापस्यास्य विनाशने|
SP0490112: उपायमन्यं पश्यस्व प्रसादं कुरु नः प्रभो|| ११||
SP0490121: स एवमुक्तो भगवान्यमः प्रेताधिपस्तदा|
SP0490122: सर्वधर्मार्थकुशलान्पृच्छते ऋषिसत्तमान्|| १२||
SP0490131: भगवन्तः कथं त्वस्य कृतघ्नस्य दुरात्मनः|
SP0490132: निष्कृतिः सुमहाघोराद्भवेत्पापस्य कर्मणः|| १३||
SP0490141: ततस्ते ऋषयः सर्वे दृष्ट्वा दीर्घेण चक्षुषा|
SP0490142: यमं धर्मभृतां श्रेष्ठमिदं वै ब्रुवते वचः|| १४||
SP0490151: ब्रह्मघ्ने च सुरापे च चोरे भग्नव्रते तथा|
SP0490152: निष्कृतिर्विहिता सद्भिः कृतघ्ने नास्ति निष्कृतिः|| १५||
SP0490161: ततः स भगवान्देवो मार्तण्डतनयो वरः|
SP0490162: नरकेभ्यो ददात्याज्ञां सर्वे यूयमिमं नरम्|
SP0490163: शोधयिष्यथ गच्छध्वं नैका ह्यस्य गतिः स्मृता|| १६||
SP0490171: ततस्ते तस्य वचनान्नरकाः पापकर्मिणम्|
SP0490172: सर्वेष्वेवानुपूर्वेण यातयन्त्यतिदारुणम्|| १७||
SP0490181: भर्तृपिण्डापहर्ता च पितृपिण्डापहारकः|
SP0490182: तस्माद्गृहीत्वा विद्यां च दक्षिणां यो न यच्छति|| १८||
SP0490191: पुष्टश्च यः स्वं नान्वेति यश्च तं घातयेन्नरः|
SP0490192: कृतस्य दोषं वदति सकामं न करोति च|
SP0490193: न स्मरेच्च कृतं यस्तु आश्रमान्यश्च दूषयेत्|| १९||
SP0490201: न पुष्णाति तथा वाहानाश्रितांश्चोपकारिणः|
SP0490202: भृत्यांश्च कर्मनिरतांस्तथैव हितकारिणः|
SP0490203: भार्याकर्मकरीणां च नर्माणि वदते च यः|| २०||
SP0490211: न दत्तं न हुतं किं चिदमुष्मिन्निति यो वदेत्|
SP0490212: सर्वांस्तानृषिभिः सार्धं कृतघ्नानब्रवीन्मनुः|| २१||
SP0490221: कृतघ्नश्च शठश्चैव नास्तिको ऽच्छिन्नसंशयः|
SP0490222: एतान्सर्वे ऽभिगच्छन्ति य एते कीर्तिता मया|| २२||
SP0490231: उत्पादकोपनेता च यश्च विद्यां प्रयच्छति|
SP0490232: भयत्रातान्नदाता च पञ्चैते पितरः स्मृताः|| २३||
SP0490241: यस्तेषां दोषवक्ता च अभ्यसूयक एव च|
SP0490242: तथा द्रोहप्रवृत्तश्च संत्यजेत्तान्नराधमः|| २४||
SP0490251: मित्रध्रुग्यश्च दुष्टात्मा तस्य रन्ध्रावकीर्तकः|
SP0490252: कृतोपकारिणे पूर्वं न करोति प्रियं च यः|| २५||
SP0490261: एते सर्वे नरा दुष्टाः सर्व एवाशुभे रताः|
SP0490262: नरकान्संप्रपद्यन्ते बद्धाः पापेन कर्मणा|| २६||
SP0490271: एते सर्वे मया प्रोक्ता महानिरयगामिनः|
SP0490272: उच्छ्रयानेव गच्छन्ति ये ऽन्ये पापकृतो जनाः|| २७||
SP0490281: य इमं तामसं घोरं शृणुयाद्वा पठेत वा|
SP0490282: अधर्माच्च निवर्तेत स गच्छेद्ब्रह्मणः पदम्|| २८||
SP0499999: स्कन्दपुराण एकोनपञ्चाशत्तमो ऽध्यायः||