Skandapurāṇa Adhyāya 91

E-text generated on February 12, 2019 from the original TeX files of: Peter C. Bisschop and Yuko Yokochi, eds. The Skandapurāṇa. Vol. IV. Start of the Skanda and Andhaka Cycles. Critical Edition with an Introduction & Annotated English Synopsis, in cooperation with Diwakar Acharya and Judit Törzsök. Leiden/Boston: Brill, 2018.

SP0910010: sanatkumāra uvāca|
SP0910011: tasminbale tathā tena somenāpratimaujasā|
SP0910012: hanyamāne mahāmāyaḥ samāśvasya tadāsuraḥ|| 1||
SP0910021: hiraṇyākṣo diteḥ putra idamāha ruṣānvitaḥ|
SP0910022: garutmataḥ sutaṃ vīraṃ rathayantāramabravīt|| 2||
SP0910031: khageśvara na te lajjā bhavatīha raṇārṇave|
SP0910032: yanmā rathena saṃgrāmāttvaṃ harasyanyato 'dya vai|| 3||
SP0910041: kiṃ vakṣyantyasurāḥ sarve daityāścaiva mahābalāḥ|
SP0910042: rājāsmākaṃ jitaḥ saṃkhye śatrubhiḥ śatrutāpanaḥ|| 4||
SP0910051: jīvitaiṣī parityajya bālānasmāndurātmavān|
SP0910052: raṇādadya gataḥ kvāpi dhiṅmāmaśubhakāriṇam|| 5||
SP0910061: kaśyapasya suto bhūtvā bhrātā daityasya saṃmataḥ|
SP0910062: hiraṇyakaśipordaityo mahāyogabalānvitaḥ|| 6||
SP0910071: agrataḥ sarvadaityānāṃ dānavānāṃ tathaiva ca|
SP0910072: rājā svāmī ca vṛddhaśca nirjitaḥ śatrubhiḥ katham|| 7||
SP0910081: athavā devapakṣasya tvaṃ putro vai garutmataḥ|
SP0910082: tameva pakṣaṃ bhajase na mā tvaṃ parirakṣase|| 8||
SP0910091: nāhaṃ tava na śakto 'dya śiraḥ kāyātsakuṇḍalam|
SP0910092: khaḍgenānena tīkṣṇena chetuṃ khagakulādhama|| 9||
SP0910101: mitraṃ tvaṃ mama mandasya purā bālasakheti ca|
SP0910102: ataḥ kṛtvābhirakṣāmi gaccha mukto 'si doṣavān|| 10||
SP0910111: tasya tadvacanaṃ śrutvā rathayantā khageśvaraḥ|
SP0910112: uvāca ślakṣṇayā vācā hiraṇyākṣaṃ mahāsuram|| 11||
SP0910121: mā krudho dānavaśreṣṭha nāsmi daitya tavāhitaḥ|
SP0910122: tvaṃ hi mūḍho 'bhavatpūrvaṃ śareṇa hṛdi vikṣataḥ|
SP0910123: tato 'pavāhitaḥ kṣipraṃ raṇādrakṣārthameva hi|| 12||
SP0910131: sūtāḥ śāstravidaścaiva bruvate dānaveśvara|
SP0910132: dampatī rathiyantārau parasparamanuvratau|| 13||
SP0910141: rathinā śastraghātebhyo rakṣyo yantā yathā priyā|
SP0910142: tena caiva rathī rakṣyo yathā bhartā jayāvahaḥ|| 14||
SP0910151: sa bhavānripuṇā bhinno hyavabaddhaśca saṃyuge|
SP0910152: aśaktaḥ syāditītyevaṃ mayā kṣipraṃ pravāhitaḥ|| 15||
SP0910161: āśvasya balamādāya punaryuddhena daṃśitaḥ|
SP0910162: ripuṃ jeṣyasi saṃgrāmetyevaṃ tvamapavāhitaḥ|| 16||
SP0910171: ye hi kāle 'payānti sma kāle cāyānti daṃśitāḥ|
SP0910172: teṣāṃ nu sulabho daitya jayo yuddhe mahātmanām|| 17||
SP0910181: na cāhamahitaḥ satyaṃ hitakṛttava nityadā|
SP0910182: mā śaṅkāṃ kuru daityendra śape satyena sarvataḥ|| 18||
SP0910191: na caitadbhītavākyaṃ me kṛto 'hamamaraḥ purā|
SP0910192: tathaivāmṛtapaścāhaṃ na mṛtyurmama vidyate|| 19||
SP0910201: ahaṃ garutmataḥ putro devānhitvāsurāngataḥ|
SP0910202: tavaiva daitya snehena mā śaṅkāṃ tvaṃ kṛthā mayi|| 20||
SP0910211: etadbalaṃ candramasā vahninā cāvapīḍitam|
SP0910212: trāhi kṣipraṃ mahābāho na śokaṃ kartumarhasi|| 21||
SP0910221: imaṃ rathaṃ samāsthāya dhanuṣā vā balena vā|
SP0910222: jahi śatrūnmahārāja mā naśyantu diteḥ sutāḥ|| 22||
SP0910230: sanatkumāra uvāca|
SP0910231: tataḥ sa taṃ pariṣvajya pakṣirājaṃ mahāsuraḥ|
SP0910232: abhidudrāva vegena rathenāmbudanādinā|| 23||
SP0910241: tasyāpatata evātha savahniścandramāstathā|
SP0910242: śarairāśīviṣākārairdhvajaṃ cicchedaturyudhi|| 24||
SP0910251: tathā lalāṭe viddhvainaṃ tau devau śaśipāvakau|
SP0910252: yugāntāmbudavadvyāsa nādamuccaiḥ pracakratuḥ|| 25||
SP0910261: tayostallāghavaṃ dṛṣṭvā hiraṇyākṣaḥ pratāpavān|
SP0910262: āgneyenāstramukhyena śiśiraṃ tadvyanāśayat|| 26||
SP0910271: tuṣāravarṣaṃ taṃ dagdhvā tato 'sau māyayā punaḥ|
SP0910272: saṃmohayitvā vegena rāhurbhūtvābhidudruve|| 27||
SP0910281: sa rāhuṇā tadā tena grasyamānaḥ khageśvaraḥ|
SP0910282: raṇaṃ tyaktvānyato yātastato daityo nanāda ha|| 28||
SP0910291: dānavāpi hi te sarve naṣṭe tasminhimāśaye|
SP0910292: samāśvasya punaścakruryuddhaṃ suragaṇaiḥ saha|| 29||
SP0910301: te 'mbudāśanisamudravegasamanādino
SP0910302: daityadānavamahārathapravarasādinaḥ|
SP0910303: āśvasanta punareva yuddhajayakāṃkṣiṇo
SP0910304: darpitā iva mahāgajā vanamapāśritāḥ|| 30||
SP0919999: iti skandapurāṇa ekanavatitamo 'dhyāyaḥ||