Skandapurāṇa Adhyāya 88

E-text generated on February 12, 2019 from the original TeX files of: Peter C. Bisschop and Yuko Yokochi, eds. The Skandapurāṇa. Vol. IV. Start of the Skanda and Andhaka Cycles. Critical Edition with an Introduction & Annotated English Synopsis, in cooperation with Diwakar Acharya and Judit Törzsök. Leiden/Boston: Brill, 2018.

SP0880010: sanatkumāra uvāca|
SP0880011: aryamā bahubhirbāṇaiḥ prahlādaṃ daityapuṃgavam|
SP0880012: ājaghāna nadanghoraṃ dhvajaṃ cāsya vyaśātayat|| 1||
SP0880021: prahlādo 'pyaryamantaṃ vai rathaṃ tyaktvaiva vīryavān|
SP0880022: pradudrāva yathā rāhuḥ samaye timirāpaham|| 2||
SP0880031: ādhāvantaṃ ca vegena vihastaṃ ripumaryamā|
SP0880032: jaghāna bahubhirbāṇaiḥ prahlādaṃ daityapuṃgavam|| 3||
SP0880041: śarānagaṇayanneva hiraṇyakaśipoḥ sutaḥ|
SP0880042: krodhānmānācca darpācca vegena samadhāvata|| 4||
SP0880051: gṛhītvā kūbare tasya rathaṃ hemapariṣkṛtam|
SP0880052: cikṣepa saha sūtena tato harṣānnanāda ca|| 5||
SP0880061: anuhlādo dharaṃ prāpya tena viddhaḥ stanāntare|
SP0880062: asiṃ niṣkṛṣya vegena dharasya rathamāsadat|| 6||
SP0880071: dhvajamīṣāṃ hayāṃścaiva sārathiṃ dhanureva ca|
SP0880072: chittvā skandhe dharaṃ caiva punaḥ svarathamabhyagāt|| 7||
SP0880081: karmaṇā tena daityasya dharo bhayasamīritaḥ|
SP0880082: anuhlādaṃ tatastyaktvā yayāvindurathaṃ prati|| 8||
SP0880091: dhruvastu hradamāsādya kṛtvā yuddhaṃ mahābhayam|
SP0880092: māyayābhijito yuddhe prādravadbhayapīḍitaḥ|| 9||
SP0880101: evamanyaiśca daityendrairanye devā mahābalāḥ|
SP0880102: nirjitāstarjitāścaiva yuddhāya ca punaḥ sthitāḥ|| 10||
SP0880111: tataḥ saṃkulamevābhūddevānāṃ dānavaiḥ saha|
SP0880112: parasparajigīṣūṇāṃ yuddhaṃ bhīrubhayāvaham|| 11||
SP0880121: tato bheryaśca śaṅkhāśca paṭahāḥ saikapuṣkarāḥ|
SP0880122: jharjharyaḥ pepukāścaiva ḍiṇḍimā goviṣāṇikāḥ|
SP0880123: avādyanta bale vyāsa ubhayeṣāṃ sahasraśaḥ|| 12||
SP0880131: tato 'sṛgoghaprabhavā patākādhvajapādapā|
SP0880132: gajāśvagrāhabahulā rathapravarakacchapā|| 13||
SP0880141: keśaśaivālabahulā dhanurjyākṛtatantukā|
SP0880142: niṣṭanantogramaṇḍūkā dukūlacchatraphenilā|| 14||
SP0880151: uṣṇīṣavarahaṃsā ca karapādaśiropalā|
SP0880152: hārakeyūrasikatā mukuṭotphullapaṅkajā|| 15||
SP0880161: manuṣyakaphapaṅkā ca prāṇajīvitanāśanī|
SP0880162: prāvartata nadī ghorā hastyaśvarathavāhinī|| 16||
SP0880171: tasyāṃ snāyanti rakṣāṃsi pibanti ca ramanti ca|
SP0880172: nṛtyante cāpi vividhā bhīrūṇāṃ bhayadāstadā|| 17||
SP0880181: gṛdhrā gomāyavaścaiva śuno jarjaravāyasāḥ|
SP0880182: cakṣūṃṣi karapādāntrānbhakṣayanto dine dine|| 18||
SP0880191: mamāyaṃ hastinaḥ pādo mamāyaṃ medapaṭṭakaḥ|
SP0880192: mamāyaṃ ca karaḥ śubhro hradaśca rudhirasya ha|| 19||
SP0880201: mamāyaṃ tava nāyaṃ ca gṛhṇa paśyeti caiva hi|
SP0880202: kalahaṃ cakrire tatra krūrāḥ piśitabhojanāḥ|| 20||
SP0880211: tyaktvānye ca hatāstatra svadehānsumahārathāḥ|
SP0880212: vimānaiḥ strījanākīrṇaiḥ prayayurbrahmaṇaḥ sadam|| 21||
SP0880221: apare pāpakarmāṇo hanyamānā ruṣānvitaiḥ|
SP0880222: patanti narake ghore krandamānā muhurmuhuḥ|| 22||
SP0880231: kecidārtasvaraṃ kṛtvā yācamānāstṛḍārditāḥ|
SP0880232: mriyante puruṣā yuddhe śataśo 'tha sahasraśaḥ|| 23||
SP0880241: daśantaśca tṛṇānyanye tāta putreti cāpare|
SP0880242: krandamānā narā bhītāḥ prāṇānkṛcchreṇa tatyajuḥ|| 24||
SP0880251: saṃdaṣṭauṣṭhapuṭāḥ keciddevāsuramahārathāḥ|
SP0880252: śarasaṃbhinnamarmāṇaḥ patantyurvyāṃ drumā iva|| 25||
SP0880261: aśivāni śivā neduraṭṭahāsāṃśca rākṣasāḥ|
SP0880262: ārtanādāṃśca puruṣāstathaiva gajavājinaḥ|| 26||
SP0880271: siṃhanādāśca śūrāṇāṃ bāhuśabdāśca puṣkalāḥ|
SP0880272: dhanuṣāṃ kṛṣyamāṇānāṃ śabdo vādyaravastathā|| 27||
SP0880281: athendraśca dhaneśaśca yamaḥ kālaśca vīryavān|
SP0880282: varuṇo marutaścaiva viśvedevāśca sarvaśaḥ|| 28||
SP0880291: mitraścaiva jayantaśca bhagaḥ pūṣāryamā tathā|
SP0880292: kāpālī cāpi yo rudro vasavaśca mahābalāḥ|
SP0880293: nāsatyaścaiva dasraśca pṛśnayaśca surottamāḥ|| 29||
SP0880301: ete cānye ca devānāṃ pravarā bāhuśālinaḥ|
SP0880302: dānavānāṃ bale vegaṃ vegavanto 'bhicakrire|| 30||
SP0880311: sāgarā iva garjanto yugānte analā iva|
SP0880312: prabhañjanā ivākāle mahānta iva cācalāḥ|| 31||
SP0880321: vṛṣabhā iva nardanto bṛṃhanta iva kuñjarāḥ|
SP0880322: grasantaśca yathā grāhāśchindanto makarā iva|| 32||
SP0880331: varṣamāṇā iva ghanāḥ siṃhā iva ca nardanāḥ|
SP0880332: dānavānāṃ balaṃ sarve vegenaiva vyanāśayan|| 33||
SP0880341: taddevavegaprahatātivegaṃ balaṃ samantāddanudānavānām|
SP0880342: bhavatyanādhāramatiprasaktaṃ tṛṇaṃ yathā vahnimukhāvasaktam|| 34||
SP0889999: iti skandapurāṇe 'ṣṭāśītitamo 'dhyāyaḥ||