Skandapurāṇa Adhyāya 76

E-text generated on February 12, 2019 from the original TeX files of: Peter C. Bisschop and Yuko Yokochi, eds. The Skandapurāṇa. Vol. IV. Start of the Skanda and Andhaka Cycles. Critical Edition with an Introduction & Annotated English Synopsis, in cooperation with Diwakar Acharya and Judit Törzsök. Leiden/Boston: Brill, 2018.

SP0760010: sanatkumāra uvāca|
SP0760011: atha tasyāṃ saha strībhiḥ kaumudyāṃ daityadānavāḥ|
SP0760012: remire raktamanaso devāḥ svargagatā iva|| 1||
SP0760021: tatra kācicchubhāpāṅgī padmaṃ divyaṃ mukhopari|
SP0760022: mukhāravindatrāṇārthaṃ dadau somabhayādiva|| 2||
SP0760031: aparā caraṇenetya priyaṃ mattābhyatāḍayat|
SP0760032: śītāṃśuriva pādena vikacaṃ śaradambujam|| 3||
SP0760041: aparā rājamārgāṇāmanabhijñāḥ kulastriyaḥ|
SP0760042: sphāṭikopacitāṃ bhūmiṃ dṛṣṭvā muñcanti pādukām|| 4||
SP0760051: utkṛṣya vasanāṃścānyā viprendra jalaśaṅkayā|
SP0760052: rājamārgeṣu gacchanti dṛṣṭvā maṇicitāṃ bhuvam|| 5||
SP0760061: kācitpriyeṇa saṃtyaktā raktenānyatra nirgatā|
SP0760062: gṛhāccandrāṃśubhiḥ spṛṣṭā papāta madanālasā|| 6||
SP0760071: kācitprāyeṇa santyaktā vimānāttatra nirgatā|
SP0760072: patitaiva ca sā somamuvācedaṃ kulāṅganā|
SP0760073: bhūyo māṃ tvaṃ karaistīkṣṇairdahase nalinīmiva|| 7||
SP0760081: madanena kathaṃ dagdhāṃ na jīvayasi māṃ dṛḍham|| 8||
SP0760091: kāścidramantyo dolāsu dolayantyo varastriyaḥ|
SP0760092: jalacandrā ivābhānti vīcīcañcalamūrtayaḥ|| 9||
SP0760101: kecidgāyanti sahitāḥ strībhirdaityā mahābalāḥ|
SP0760102: gandharvā nandanavane apsarobhiryathā saha|| 10||
SP0760111: rājamārgaḥ kvacidbhāti strībhirbahvībhirāvṛtaḥ|
SP0760112: yathā nabhasi citro 'sau divyo devapathaḥ śubhaḥ|| 11||
SP0760121: kvacinnūpurakāñcīnāṃ kokilānāṃ ca nisvanaḥ|
SP0760122: babhau śrotrasukhaḥ śrotuṃ kalāmadanadīpanaḥ|| 12||
SP0760131: kvacidramaṇaraktānāṃ strīṇāṃ vyāsa priyaiḥ saha|
SP0760132: hṛdayavyākulakaraḥ śrūyate madhurasvaraḥ|| 13||
SP0760141: evaṃ samabhavadvyāsa bahucitrastadotsavaḥ|
SP0760142: dānavānāṃ tadā prītisaukhyaviśrambhavardhanaḥ|| 14||
SP0760151: tasminnuparate bhūyaḥ pūrvavatsaṃpratiṣṭhite|
SP0760152: prakṛtisthe jane vyāsa dānavāste samāgatāḥ|
SP0760153: viviśurbhīmasaṃhrādāḥ sabhāṃ divyāṃ manoramām|| 15||
SP0760161: jāmbūnadamayastambhāṃ vajravaiḍūryavedikām|
SP0760162: muktādāmāvalambāḍhyāṃ sragdāmottamabhūṣitām|| 16||
SP0760171: vajravaiḍūryanīlendramahānīlāmrapallavaiḥ|
SP0760172: lohitaiḥ sphāṭikaiścaiva tathā marakatairapi|| 17||
SP0760181: divyajālopasaṃnaddhāṃ kiṅkiṇīcitraśobhitām|
SP0760182: bahupuṣpaphalaiścaiva sarvakāmapradairdrumaiḥ|| 18||
SP0760191: upetāṃ dīrghikābhiśca bahuśayyāsanāṃ śubhām|
SP0760192: aklamāṃ bahuniṣyandāṃ sarvaduḥkhavivarjitām|| 19||
SP0760201: sarvakāmasamṛddhāṃ ca bahustrīpuruṣākulām|
SP0760202: viviśustāṃ sabhāṃ divyāṃ daityā darpasamāvṛtāḥ|| 20||
SP0760211: prahlādaścānuhlādaśca śinirbāṣkala eva ca|
SP0760212: virocano baliścaiva baliputrāśca viśrutāḥ|| 21||
SP0760221: sahasrāṇi daśa dve ca yeṣāṃ śreṣṭho mahābalaḥ|
SP0760222: bāṇo nāma mahāmāyo rājā bāhusahasradhṛk|| 22||
SP0760231: bāṇasya putrā ye cānye sahasrāṇi daśaiva te|
SP0760232: muro 'tha muṣumaṇḍaśca vipracittiśca dānavaḥ|| 23||
SP0760241: halo hayaśirāścaiva śambaraḥ kālaśambaraḥ|
SP0760242: viśrutaścendradamanaḥ kālanemī ca dānavaḥ|| 24||
SP0760251: tathā sundanisundau ca vipākaḥ pāka eva ca|
SP0760252: rāhuśca śataketuśca dhvajastāraḥ satārakaḥ|| 25||
SP0760261: mahiṣo dundubhiścaiva kālakaśca mahābalaḥ|
SP0760262: andhakaśca tathāṭiśca bakaḥ śarabha eva ca|| 26||
SP0760271: svarbhānurvṛṣaparvā ca madhuḥ kaiṭabha eva ca|
SP0760272: mahākāyaḥ śatānandaḥ śatadundubhireva ca|| 27||
SP0760281: kārtasvanaśca hastī ca valo naraka eva ca|
SP0760282: dhvāṅkṣo mūkelvalau cāpi vātāpī sāsṛpuñjikaḥ|| 28||
SP0760291: kuṇḍalaścaiva mīḍhaśca pulomā caiva viśrutaḥ|
SP0760292: dhundhuśca śatamāyaśca śatāvarto 'tha duḥsahaḥ|| 29||
SP0760301: candrasūryau naraścaiva devāntakanarāntakau|
SP0760302: brahmahā yajñahā caiva ilvalaḥ pilvakastathā|| 30||
SP0760311: mayaśca dānavaśreṣṭho mayaputrāśca viśrutāḥ|
SP0760312: teṣāmaṣṭau sahasrāṇi sarve ca kṛtaniścayāḥ|| 31||
SP0760321: vṛtraśca dānavaśreṣṭho namucirbhajahastathā|
SP0760322: śatodaraśca vyaṃsaśca tathāyaśca hradodaraḥ|| 32||
SP0760331: keśī pralambaśca tathā kabandho dhenukaśca ha|
SP0760332: hālo gārgyaśirāścaiva kuśaḥ śambhustathaiva ca|| 33||
SP0760341: tathā gaganamūrdhnā ca sālukaḥ sālva eva ca|
SP0760342: meghanādaśca vikhyāto mahānādastathaiva ca|| 34||
SP0760351: kharo 'tha khararomā ca sūcīlomā ca dānavaḥ|
SP0760352: parigho 'parighaścaiva daṇḍaḥ kāśyapa eva ca|| 35||
SP0760361: dundubhiśca mahākāyaḥ saiṃhikeyaśca yo gaṇaḥ|
SP0760362: tathā hālāhalaścaiva andhakāraka eva ca|| 36||
SP0760371: paulomāḥ ṣaṣṭisāhasrāḥ kālakeyāśca viśrutāḥ|
SP0760372: kālakañjāḥ sahasrāṇi aṣṭau te devakaṇṭakāḥ|| 37||
SP0760381: nivātakavacānāṃ ca tisraḥ koṭyo mahābalāḥ|
SP0760382: tā etā gaṇitāḥ sarvāḥ koṭyaḥ ṣaṣṭiḥ suradviṣām|| 38||
SP0760391: tatpakṣānvarjayitvā tu manuṣyānpannagānapi|
SP0760392: rākṣasāśca piśācāśca yakṣāḥ pakṣiṇa eva ca|
SP0760393: teṣāmapi tadā vyāsa koṭyo viṃśatisaṃgatāḥ|| 39||
SP0760401: te tāṃ sabhāṃ samāviśya sarve darpātsuradviṣaḥ|
SP0760402: savidyudulkā bhānti sma prāvṛḍjaladharā iva|| 40||
SP0760411: te sravanta ivāmbhodāḥ sadhūmā iva parvatāḥ|
SP0760412: mahiṣā iva nardantaḥ ketavo 'nāgatā iva|| 41||
SP0760421: utpātā iva nighnantaḥ saviṣā iva pannagāḥ|
SP0760422: gajā iva ca saṃmattāḥ pavanā iva vegitāḥ|
SP0760423: surāṇāṃ viprakārārthaṃ tasthurāpūrya tāṃ sabhām|| 42||
SP0760431: atha gatvā sabhāpālo rājānamidamabravīt|
SP0760432: sukhāsīnaṃ tadā vyāsa siṃhāsanagataṃ yuvā|| 43||
SP0760441: praṇamya śirasā pūrvaṃ jānubhyāmavaniṃ gataḥ|
SP0760442: baddhāñjalipuṭaḥ samyagvācā ślakṣṇapadākṣaram|| 44||
SP0760451: svāmī jayatu sarveṣāmasurāṇāṃ jayāvahaḥ|
SP0760452: prahlādādyāḥ sabhāṃ sarve vipracittipurogamāḥ|
SP0760453: prāptā viditamastveva yadanyatkartumarhasi|| 45||
SP0760460: sanatkumāra uvāca|
SP0760461: tataḥ suradviṣaḥ śrutvā sarvānprāptānsabhāṃ tadā|
SP0760462: uttasthau sahasā rājā śakraketurivotsave|| 46||
SP0760471: sa kirīṭī mahādaṃṣṭro muñjakeśo mahāhanuḥ|
SP0760472: ā karṇāddāritāsyaśca mahāchattraśirāstathā|| 47||
SP0760481: ājānubāhurvṛttākṣaḥ piṅgākṣaścordhvaromavān|
SP0760482: vajrasaṃhananaścaiva mahāyogī mahābalaḥ|
SP0760483: kirīṭenātisaṃbhāti raviṇevodayastathā|| 48||
SP0760491: hāravaryāṅkitoraskaḥ sabalāka ivāmbudaḥ|
SP0760492: saputraḥ prayayau vyāsa himavāniva mūrtimān|| 49||
SP0760501: sa tāṃ tadā dānavarājasattamo vicitraratnāṃśuparītakuṇḍalaḥ|
SP0760502: sabhāṃ viveśāsuradaityapuṅgavaiḥ samāvṛtāṃ dyāmuditairgrahairiva|| 50||
SP0769999: iti skandapurāṇe ṣaṭsaptatitamo 'dhyāyaḥ||